Kryetari i Komunës së Podujevës, Shpejtim Bulliqi, mori pjesë në Punëtorinë për hartimin e Strategjisë Kosovare për Menaxhimin e mbeturinave, e cila u mbajt në Stamboll të Turqisë.
Punëtoria ishte e organizuar për kryetarët e komunave nga Asociacioni i Komunave të Kosovës dhe mbështetur nga Bashkimi Evropian dhe GIZ.
Kryetari Bulliqi gjatë qëndrimit tre ditorë zhvilloi takim me kryetarin e komunës së Bagcilarit, Abdullah Özdemir, i cili ndau përvojat e komunës së tij rreth menaxhimit të mbeturinave, si dhe pas takimit vizituan edhe fabrikën kryesore të mbeturinave të kësaj komune për të parë nga afër funksionimin e saj, e cila bën grumbullimin dhe reciklimin e mbeturinave për 750 mijë banorë të kësaj zone.
Kryetari Bulliqi gjithashtu vizitoi edhe komunën Pendik, ku u prit nga kryetari i saj, i cili ndau përvojat e mira rreth menaxhimit të mbeturinave me qëllim që të njëjtat të përfshihen në strategjinë e komunës sonë.
Gjatë qëndrimit në Turqi kryetari Bulliqi u shpreh i kënaqur ku tha se “kjo nismë e re është një fillim i mirë për nxitjen e bashkëpunimit mes komunave dhe shprehjen e zotimit të përbashkët për të shkuar një hap tutje drejt avancimit në aspektin e menaxhimit të mbeturinave dhe kujdesit ndaj mjedisit”.
Objektivat e përgjithshme të punëtorisë ishin rrugët drejt ekonomisë qarkore, duke u përkujdesur për ruajtjen e shëndetit publik dhe zvogëlimin e ndikimit mjedisor nga komunat.
Kryetari Bulliqi tha se praktikat e mira në kuadër të takimeve dhe vizitave do t’i marrim dhe do të fillojmë t’i implementojmë bashkarisht në komunat tona.
13.05.2022, Podujevë
Zyra për Marrëdhënie me Publikun dhe Informim
